ട്രേഡ് ടെസ്റ്റ്: സോഷ്യല്‍ സ്റ്റഡീസിനു പകരം എംപ്ലോയബിലിറ്റി സ്‌കില്‍

2012 ആഗസ്ത് മുതല്‍ അഡ്മിഷന്‍ നേടിയ ട്രെയിനികള്‍ക്കും 2013 ജനവരി/ ഫിബ്രവരി സപ്ലിമെന്ററി അഖിലേന്ത്യാ ട്രേഡ് ടെസ്റ്റില്‍ ആദ്യമായി പങ്കെടുക്കുന്ന പ്രൈവറ്റ് ട്രെയിനികള്‍ക്കും സോഷ്യല്‍സ്റ്റഡീസ് വിഷയത്തിനു പകരം എംപ്ലോയബിലിറ്റി സ്‌കില്‍ എന്ന വിഷയത്തിലായിരിക്കും ട്രേഡ് ടെസ്റ്റ് എഴുതേണ്ടത്. ഇതു സംബന്ധിച്ച വിവരങ്ങള്‍ www.dget.nic.in വെബ്‌സൈറ്റില്‍.

പിന്നാക്ക വിദ്യാര്‍ത്ഥികള്‍ക്ക് ആനുകൂല്യം

2005 മുതല്‍ 2009 വരെയുളള കാലയളവില്‍ ഗവ.ആര്‍ട്‌സ് കോളേജില്‍ നിന്നും പഠനം പൂര്‍ത്തിയാക്കിയ എസ്.സി/ എസ്.ടി./ ഒ.ഇ.സി/ ഒ.ബി.സി./ കെ.പി.സി.ആര്‍. എന്നീ വിഭാഗങ്ങളിലെ ആനുകുല്യം കൈപ്പറ്റാത്ത വിദ്യാര്‍ത്ഥികള്‍ ബന്ധപ്പെട്ട രേഖകള്‍ സഹിതം ഡിസംബര്‍ 24 ന് മുന്‍പ് ഓഫീസ് പ്രവൃത്തിദിവസങ്ങളില്‍ രണ്ടു മണിക്കുള്ളില്‍ ഹാജരായി തുക കൈപ്പറ്റണമെന്ന് പ്രിന്‍സിപ്പല്‍ അറിയിച്ചു. ആനുകൂല്യങ്ങള്‍ കൈപ്പറ്റിയില്ലെങ്കില്‍ തുക സര്‍ക്കാരിലേക്ക് തിരിച്ചടയ്ക്കും.

പുനര്‍മൂല്യനിര്‍ണയം: അപേക്ഷ ക്ഷണിച്ചു

ജൂലായില്‍ നടന്ന അഖിലേന്ത്യാ ട്രേഡ് ടെസ്റ്റില്‍ പങ്കെടുത്ത ട്രെയിനികള്‍ക്ക് എഴുത്ത് പരീക്ഷയില്‍ റീ-കൗണ്ടിങ്ങിന് നിര്‍ദിഷ്ട ഫോറത്തില്‍ അപേക്ഷിക്കണം. തോറ്റുപോയ വിഷയത്തിന് പത്ത് രൂപയും വിജയിച്ച വിഷയത്തിന് 25 രൂപയുമാണ് ഫീസ്. റീ-കൗണ്ടിങ്ങിന് വേണ്ടി 0230-എല്‍ ആന്‍ഡ് ഇ-00800-അദര്‍ റസീപ്റ്റ്‌സ്-88-അദര്‍ ഐറ്റംസ് എന്ന ശീര്‍ഷകത്തില്‍ ഫീസിനത്തില്‍ ഒടുക്കണം. പൂരിപ്പിച്ച അപേക്ഷ ചെലാന്‍ സഹിതം ഡിസംബര്‍ ഏഴിന് മുന്‍പ് ഗവണ്‍മെന്റ്/ പ്രൈവറ്റ് ഐ.ടി.ഐ. പ്രിന്‍സിപ്പല്‍മാര്‍ക്ക് നല്‍കിയിരിക്കണം. അപേക്ഷകളുടെ മാതൃക ഗവണ്‍മെന്റ്/ പ്രൈവറ്റ് ഐ.ടി.ഐകളില്‍ നിന്നും www.det.kerala.gov.in വെബ്‌സൈറ്റില്‍ നിന്നും ലഭിക്കും.

എന്‍ഡോവ്‌മെന്റിന് അപേക്ഷിക്കാം

കോഴിക്കോട്, കണ്ണൂര്‍, കാസര്‍ഗോഡ് ജില്ലകളിലെ ധീവര സമുദായത്തില്‍പ്പെട്ട ഒന്നാം വര്‍ഷ ബിരുദ ബിരുദാനന്തര കോഴ്‌സിന് പഠിക്കുന്ന വിദ്യാര്‍ത്ഥികളില്‍ നന്നും ലീലാഗോപാലന്‍ എന്‍ഡോവ്‌മെന്റിന് അപേക്ഷ ക്ഷണിച്ചു. അപേക്ഷകന്റെ വാര്‍ഷിക വരുമാനം 30,000 രൂപയില്‍ താഴെയായിരിക്കണം. അപേക്ഷ www.gasckkd.ac.in വെബ്‌സൈറ്റില്‍ നിന്നും ഡൗണ്‍ലോഡ് ചെയ്യണം. അപേക്ഷയും അനുബന്ധ രേഖകളും പ്രിന്‍സിപ്പല്‍, ഗവ.ആര്‍ട്‌സ് ആന്റ് സയന്‍സ് കോളേജ്, കോഴിക്കോട് - 18 വിലാസത്തില്‍ ഡിസംബര്‍ 21 ന് മുമ്പ് ലഭിക്കണം.

കേസരി മാധ്യമ പുരസ്‌കാരത്തിന് അപേക്ഷ ക്ഷണിച്ചു

കോഴിക്കോട്: മാധ്യമ പ്രവര്‍ത്തകര്‍ക്കുള്ള കേസരി രാഷ്ട്രസേവാ, രാഘവീയം പുരസ്‌കാരങ്ങള്‍ക്കായി നാമനിര്‍ദേശങ്ങളും അപേക്ഷകളും ക്ഷണിച്ചു. പത്രപ്രവര്‍ത്തനരംഗത്തെ സമഗ്രസംഭാവന പരിഗണിച്ച് മുതിര്‍ന്ന പത്രപ്രവര്‍ത്തകനാണ് രാഷ്ട്രസേവാ പുരസ്‌കാരം നല്‍കുക. 50,000 രൂപയും പ്രശസ്തി പത്രവും അടങ്ങുന്നതാണ് ഇത്. പത്രപ്രവര്‍ത്തനരംഗത്ത് 20 വര്‍ഷത്തെ പരിചയമുള്ളവരെയാണ് പുരസ്‌കാരത്തിന് പരിഗണിക്കുക. സ്ഥാപനങ്ങള്‍ക്കും വ്യക്തികള്‍ക്കും സംഘടനകള്‍ക്കും പേരു നിര്‍ദേശിക്കാം. യുവ പ്രതിഭകള്‍ക്കാണ് 'രാഘവീയം' പുരസ്‌കാരം. 25,000 രൂപയും പ്രശസ്തിപത്രവുമടങ്ങുന്ന ഈ അവാര്‍ഡിന് മൂന്നുവര്‍ഷത്തെ പരിചയമുള്ളവരെയാണ് പരിഗണിക്കുക.

ഒരു വര്‍ഷത്തിനകം പ്രസിദ്ധീകരിച്ച സാമൂഹിക സേവന-ജീവകാരുണ്യ രംഗം സംബന്ധിച്ച റിപ്പോര്‍ട്ടും ഫീച്ചറുമാണ് പരിഗണിക്കുക. ചെറുജീവചരിത്ര കുറിപ്പ്, സാക്ഷ്യപത്രം, പ്രായം, പരിചയം, എന്നിവ തെളിയിക്കുന്ന രേഖകളും ഇതോടൊപ്പം അയയ്ക്കണം. മാനേജിങ് ട്രസ്റ്റി, കേസരി വാരിക, സ്വസ്തിദിശ, ചാലപ്പുറം, കോഴിക്കോട്, 673002 എന്ന വിലാസത്തില്‍ ഡിസംബര്‍ 25-നകം അപേക്ഷ ലഭിക്കണമെന്ന് മാനേജിങ് ട്രസ്റ്റി അറിയിച്ചു.

സിബിഎസ്ഇ സംസ്ഥാന കലോത്സവം ഇന്നുമുതല്‍

കൊച്ചി: കേരള സിബിഎസ്ഇ സ്‌കൂള്‍ മാനേജ്‌മെന്റ് അസോസിയേഷന്റെ 18-ാമത് കലോത്സവം ബുധനാഴ്ച തുടങ്ങും.

വിവിധ ജില്ലകളില്‍ നിന്നായി പതിനായിരത്തിലധികം കുട്ടികള്‍ നാലു ദിവസത്തെ കലോത്സവത്തില്‍ പങ്കെടുക്കും.

എല്‍ബിഎസ് സെന്ററില്‍ കോഴ്‌സുകള്‍

കളമശ്ശേരി: കളമശ്ശേരി എല്‍ബിഎസ് സെന്ററിന്റെ വിവിധ കോഴ്‌സുകളിലേക്ക് അപേക്ഷ ക്ഷണിച്ചു. മൂന്ന് മാസത്തെ ഡാറ്റ എന്‍ട്രി ആന്‍ഡ് ഓഫീസ് ഓട്ടോമേഷന്‍, ഡിടിപി (യോഗ്യത: എസ്എസ്എല്‍സി), കംപ്യൂട്ടറൈസ്ഡ് ഫിനാന്‍ഷ്യല്‍ അക്കൗണ്ടിങ് ഇന്‍ ടാലി (യോഗ്യത: ബികോം/പ്ലസ് ടു കോമേഴ്‌സ്), ഒരു വര്‍ഷം ദൈര്‍ഘ്യമുള്ള ഇന്റഗ്രേറ്റഡ് ഡിപ്ലോമ ഇന്‍ കംപ്യൂട്ടര്‍ ഹാര്‍ഡ്‌വെയര്‍ മെയിന്റനന്‍സ് ആന്‍ഡ് നെറ്റ്‌വര്‍ക്കിങ് (യോഗ്യത: എസ്എസ്എല്‍സി) എന്നിവയാണ് കോഴ്‌സുകള്‍. വിവരങ്ങള്‍ക്ക്: 0484-2541520, 2551466.

പാസ്‌പോര്‍ട്ട് ഓഫീസിന് ഇന്ന് അവധി

കൊച്ചി: ഗുരു നാനാക്ക് ജയന്തി പ്രമാണിച്ച് കൊച്ചി റീജണല്‍ പാസ്‌പോര്‍ട്ട് ഓഫീസിനും, കരിങ്ങാച്ചിറ, കോട്ടയം, ആലപ്പുഴ, ആലുവ, തൃശ്ശൂര്‍ എന്നിവിടങ്ങളിലെ പാസ്‌പോര്‍ട്ട് സേവാ കേന്ദ്രങ്ങള്‍ക്കും 28 ന് അവധിയായിരിക്കും.