ഡെസ്റ്റിനേഷന്
- ഇന്ത്യ
ധ്യാനത്തിന്റെ ഗുഹാമുഖങ്ങള്
Posted on: 25 May 2011
Text & Photos: K.R. Vinayan
അപൂര്വ്വ ശാന്തിയുടെ പ്രകാശം വീഴുന്ന അജന്താ ഗുഹകള്,
ചരിത്രത്തിലേക്കും കാലത്തിലേക്കും
കലയുടെ ആത്മാവിലേക്കും നീളുന്ന ഇടനാഴികള്.
അജന്തയിലെ ചിത്രശിലാവിസ്മയങ്ങള്...
|
| ക്യാമറക്ക് ഒപ്പിയെടുക്കാനാവാത്ത അഭൗമവര്ണങ്ങള് Photo: K.R. Vinayan |
പുലര്ച്ചെ ഔറംഗബാദില് ട്രെയിനിറങ്ങുമ്പോള് ആ സ്ഥലം എനിക്ക് തികച്ചും അപരിചിതമായിരുന്നു. നവംബര് മാസത്തിന്റെ അവസാനദിനങ്ങള്. റെയില്വേസ്റ്റേഷനും പരിസരങ്ങളും മൂടല്മഞ്ഞിന്റെ ആവരണത്തിലായിരുന്നു.
സ്റ്റേഷനു കുറുകെ നൂറുമീറ്റര് നടന്നാല് മഹാരാഷ്ട്ര ടൂറിസ്റ്റ് കോര്പ്പറേഷന്റെ ഓഫീസിലെത്താം. അവിടെ നിന്നും അജന്തയിലേക്കുളള വിവരങ്ങള് ശേഖരിക്കാം. ഒരു ടാക്സി കാറില് തുടര് യാത്ര.
റോഡിന് ഇരുവശവും കണ്ണെത്താ ദൂരം ഗോതമ്പു പാടങ്ങളും പൂത്തുലഞ്ഞു നില്ക്കുന്ന കടുക് തോട്ടങ്ങളും ചെറിയ ഗ്രാമങ്ങളും കടന്നുളള യാത്ര. ഇടതൂര്ന്നു നില്ക്കുന്ന മരങ്ങള്ക്കിടയിലൂടെ, ദൂരെ വലിയ കുന്നിന് ചെരിവുകള് കാണാം- ഈ സ്ഥലങ്ങള് പക്ഷെ എനിക്ക് തികച്ചും പരിചിതമായി തോന്നി.
|
| ധാതുലവണങ്ങളില് നിന്നും വ്യത്യസ്ത നിറങ്ങളുള്ള പാറകള് പൊടിച്ചെടുത്ത് ഇലകളിലേയും പഴവര്ഗ്ഗങ്ങളിലേയും ചാറ് ചേര്ത്ത് അലിയിച്ചെടുത്ത പ്രകൃതിക്കൂട്ടുകളാണത്രേ ചിത്രരചനയ്ക്കായി ഉപയോഗിച്ചിട്ടുള്ളത്. |
പുരാവസ്തു വകുപ്പിന്റെ നിയന്ത്രണത്തിലുള്ള ഓഫീസിനു മുന്നില് കാര് പാര്ക്കുചെയ്ത് കുറച്ച് ദൂരം നടന്നാല് അവര് തന്നെ നടത്തുന്ന ബസ്സ് സ്റ്റാന്ഡില് എത്താം. ശേഷം ബസ്സില്, ഏഴു കിലോമീറ്ററോളം വനത്തിലൂടെയുള്ള യാത്ര.
ദൂരെ കുന്നിന് മുകളില് നിന്നും നോക്കിയാല്, കനത്ത കരിമ്പാറക്കെട്ടുകള്ക്കിടയില് താഴെ മരങ്ങള്ക്കിടയിലൂടെ ഒഴുകുന്ന വാഗോറ നദി. നദിയുടെ വശങ്ങളില് അര്ദ്ധചന്ദ്രക്കലയുടെ ആകൃതിയില് നീണ്ടുകിടക്കുന്ന പാറക്കെട്ടുകള്ക്കിടയിലാണ് പ്രസിദ്ധമായ അജന്താ ഗുഹകള്. ആറ് കിലോമീറ്ററോളം നീളത്തിലുള്ള പാറകള് ഉള്ളിലേക്ക് തുരന്ന് നിര്മ്മിച്ചിട്ടുള്ള മുപ്പതോളം ഗുഹകള്.
|
| ഭൂരിഭാഗം ഗുഹകളിലേക്കുമുള്ള പ്രവേശനദ്വാരം അര്ദ്ധവൃത്താകൃതിയിലാണ്. കിഴക്കോട്ട് അഭിമുഖമായതിനാല് സൂര്യോദയത്തോടെ ഗുഹകളിലേക്ക് വെളിച്ചമെത്തുന്നു. |
ഗുഹകളെല്ലാം പുഴയ്ക്കഭിമുഖമായി കിഴക്കോട്ട് തിരിഞ്ഞാണ് സ്ഥിതി ചെയ്യുന്നത്. കാലത്ത് എട്ടുമണിമുതല് ഏതാണ്ട് രണ്ടുമണി വരെ ഗുഹകള്ക്ക് അരികിലും, ചിലയിടത്ത് ഉള്ളറകളിലും വെളിച്ചം വീണു കിടക്കും, ഒരു ഫോട്ടോഗ്രാഫര് എന്ന നിലയ്ക്ക് എന്നെ ഏറ്റവും ആഹ്ലാദിപ്പിച്ച കാര്യം. ക്യാമറയുമേന്തി ഞാന് ഗുഹകളിലൂടെ യാത്ര ആരംഭിച്ചു. വെളിച്ചം കുറവാണ്. ഗുഹകളിലെ ശില്പങ്ങള്ക്കും ചുമര്ചിത്രങ്ങള്ക്കും നേരിയ തോതില് ആകര്ഷകമായ വെളിച്ചവിതാനങ്ങള് ഒരുക്കിയിട്ടുണ്ടെങ്കിലും സാധാരണ ക്യാമറിയില് അവ പകര്ത്താനാവില്ല. ട്രൈപ്പോഡും ഫ്ലാഷ് ലൈറ്റും അനുവദിക്കുന്നുമില്ല.
|
|
മിക്ക ഗുഹകളിലും ചിത്രങ്ങളും ശില്പ്പങ്ങളുണ്ട്. ജാതകകഥകളെ മുന്നിര്ത്തി, രാജകുമാരനില് നിന്നും ഗൗതമബുദ്ധനിലേക്കുള്ള പരിണാമത്തിന്റെ വ്യത്യസ്ത അവസ്ഥകളെ അടിസ്ഥാനമാക്കിയിട്ടുള്ളവ. |
അജന്തയിലെ ഒന്നു മുതല് മുപ്പത്് വരെയുള്ള മിക്ക ഗുഹകളിലും ചിത്രങ്ങളും ശില്പ്പങ്ങളുണ്ട്. പൂര്ണമായും ബുദ്ധ ചരിതത്തിന്റെ വിവിധ ദശകളിലെ സംഭവങ്ങളെ കോര്ത്തിണക്കുന്നവ. ജാതകകഥകളെ മുന്നിര്ത്തി, രാജകുമാരനില് നിന്നും ഗൗതമ ബുദ്ധനിലേക്കുള്ള പരിണാമത്തിന്റെ വ്യത്യസ്ത അവസ്ഥകളെ അടിസ്ഥാനമാക്കിയിട്ടുള്ളവ.
ഭൂരിഭാഗം ഗുഹകളിലേക്കുമുള്ള പ്രവേശനദ്വാരം അര്ദ്ധവൃത്താകൃതിയിലാണ്. കിഴക്കോട്ട് അഭിമുഖമായതിനാല് സൂര്യോദയത്തോടെ ഗുഹകളിലേക്ക് വെളിച്ചമെത്തുന്നു. ഈ വെളിച്ചം നിലത്തു തളംകെട്ടി നിര്ത്തുന്ന വെള്ളത്തില് പ്രതിബിംബിപ്പിച്ചിട്ടാണത്രെ ചുമരുകളിലും തൂണുകളിലും മുകള് വശങ്ങളിലും ചിത്രപ്പണികളും ശില്പങ്ങളും നിര്മ്മിച്ചത്! ഉച്ചവെയില് ചാഞ്ഞ് തുടങ്ങുമ്പോള് ഗുഹകള്ക്ക് പുറത്ത് നേരിയ തിളങ്ങുന്ന തകര പലകകള് നിരത്തി, അവയിലൂടെ സൂര്യവെളിച്ചം വീണ്ടും വെള്ളത്തിലേക്ക് വീഴ്ത്തി സന്ധ്യയാവുന്നത് വരെ, മഹാമുനികളെ പോലെ ഏകാഗ്രതയോടെ ആ ശില്പികള് ജോലി ചെയ്തു.
|
| Map of Ajanta Caves. Illustration: KKRavi |
ഒന്നു മുതല് പതിനാറു വരെയുള്ള ഗുഹകളാണ് കൂട്ടത്തില് പ്രാധാന്യമേറിയവ. ബാക്കി വരുന്ന പല ഗുഹകളും അപൂര്ണമാണ്. പ്രധാന ഗുഹകളിലെ ചിത്രങ്ങള്ക്കും അലങ്കാരത്തൂണുകള്ക്കും ശില്പങ്ങള്ക്കും പൂര്ണത തോന്നിക്കും. അവ ഒരുക്കുന്നതിന് വളരെ സൂക്ഷ്മമായ പഠനങ്ങളും തയ്യാറെടുപ്പുകളും നടന്നിട്ടുണ്ടെന്ന് വ്യക്തം. ഒരു പക്ഷേ പാറകള്ക്ക് മുകളിലോ പുഴയോരത്തെ വിശാലമായ തിട്ടുകളിലോ ആയിരിക്കാം അതിന്റെ സ്കെച്ച് ഒരുക്കിയിട്ടുണ്ടാവുക. ഗുഹകള്ക്കുളളിലെ പരുത്ത കരിങ്കല് ഭിത്തികളില് കളിമണ്ണും ചാണകവും പുല്ലും മൃഗങ്ങളുടെ രോമങ്ങളും കൊണ്ടുണ്ടാക്കിയ മിശ്രിതം കനത്തില് പരത്തി, മുകളില് ചുണ്ണാമ്പു പശ തേച്ച് പിടിപ്പിച്ച്, അതിന് മുകളിലാണ് ചിത്രരചന നടത്തിയിട്ടുള്ളത്.
|
| ഈ ഗുഹകളിലൂടെയുള്ള യാത്ര ബുദ്ധന്റെ ജീവിതത്തിലൂടെയുള്ള യാത്രയായി എനിക്ക്. ഓരോ നിമിഷവും തഥാഗതന്റെ ദയാനിര്ഭരമായ കണ്ണുകള് എന്നെ അനുഗമിച്ചു. |
അഭിപ്രായമെഴുതുന്നവര് ശ്രദ്ധിക്കേണ്ട ചില വസ്തുതകള്:
അസഭ്യങ്ങളും അധിക്ഷേപങ്ങളും പാടേ നിരസിക്കും. ഒന്നുകില് ഇംഗ്ലീഷിലോ അല്ലെങ്കില് മലയാളത്തിലോ വേണം അഭിപ്രായം. മംഗ്ലീഷ് വേണ്ട. മലയാളം ടൈപ്പ് ചെയ്യാന് അറിയാത്തവര്ക്ക് ഇംഗ്ലീഷില് ടൈപ്പ് ചെയ്ത് മലയാളമാക്കുന്നതിനുള്ള സംവിധാനം ഏര്പ്പെടുത്തിയിട്ടുണ്ട്. അത് ഉപയോഗപ്പെടുത്താം.
അസഭ്യങ്ങളും അധിക്ഷേപങ്ങളും പാടേ നിരസിക്കും. ഒന്നുകില് ഇംഗ്ലീഷിലോ അല്ലെങ്കില് മലയാളത്തിലോ വേണം അഭിപ്രായം. മംഗ്ലീഷ് വേണ്ട. മലയാളം ടൈപ്പ് ചെയ്യാന് അറിയാത്തവര്ക്ക് ഇംഗ്ലീഷില് ടൈപ്പ് ചെയ്ത് മലയാളമാക്കുന്നതിനുള്ള സംവിധാനം ഏര്പ്പെടുത്തിയിട്ടുണ്ട്. അത് ഉപയോഗപ്പെടുത്താം.
